Ávísi 12.5.1 Endurnýtslustigið í landinum, tons av endurnýttum tilfari

# Burturkast Allar kommunur hava innsavningarskipan til húsarhaldsburturkast, pappír og papp og serliga dálkandi burturkast, umframt at bingjupláss eru í øllum kommunum, har borgarar kunnu sleppa av við burturkast. Tað er *nýtsluskylda:* Øll skulu brúka innsavningarskipanirnar hjá kommuni ella teir avhendingarmøguleikar, ið kommunan vísir á. Innsavnað burturkast verður antin brent, tyrvt ella endurnýtt. Sumt verður bólkað sum serliga dálkandi, og verður sent av landinum til serliga viðgerð. Góðkendir móttakarar av burturkasti eru Kommunala Brennistøðin (KB) í Tórshavnar kommunu, og IRF, sum er ein interkommunalur renovatiónsfelagsskapur, ið hinar 28 kommunurnar eiga og reka. Harumframt eru fýra privatar fyritøkur eisini góðkendir móttakarar av serligum sløgum av burturkasti. KB og IRF hava hvør sær ábyrgd av at savna inn og viðgera alt burturkast í teirra kommunum. KB tekur ímóti burturkasti frá umleið 7.500 húsarhaldum og IRF frá umleið 11.000 húsarhaldum. Harafturat taka tey ímóti burturkasti frá stovnum og fyritøkum. Afturat hesum tekur spilloljuverkið hjá IRF ímóti spillolju og oljudálkaðum vatni, sum verður reinsað og selt.